AP News : ఇది మరో వలంటీర్ బాగోతం.. వరద సాయం పంపిణీలో కూడానా..!

అల్లూరి జిల్లా : వలంటీర్ల బాగోతాలు అన్నీ ఇన్నీ కావు. రోజుకొకరి బాగోతం వెలుగు చూస్తోంది. అవసరం కోసం జాబ్ తెచ్చుకుని కష్టపడి చేసేవాళ్లు లేకపోలేదు. కానీ కొందరి పనితీరు కారణంగా మొత్తం వలంటీర్ వ్యవస్థకే మచ్చ వస్తోంది. వరద సహాయం పంపిణీలో వలంటీర్ చేతివాటం చూపిన ఘటన పెద్ద ఎత్తున కలకలం రేపింది. ప్రభుత్వం మంజూరు చేసిన రెండు వేల రూపాయిల్లో వెయ్యి రూపాయలు నొక్కేశాడు. అల్లూరి జిల్లా కూనవరం మండలం టేకులబోరు పన్నెండవ వార్డులో వలెంటీర్ కొవ్వాసి ముత్యాలరావు వరద సాయం పంపిణీలో లబ్దిదారులకు ఇవ్వాల్సిన రూ.2 వేలల్లో వెయ్యి రూపాయలు మాత్రమే ఇచ్చేసి మరో వెయ్యి నొక్కేశాడు. వృద్ధురాలు అయిన అల్లారి పుష్పవేణితో పాటు మరికొంత మందికి వెయ్యి రూపాయలు మాత్రమే వలంటీర్ పంపిణీ చేశాడు. స్థానికులు రెడ్ హ్యాండెడ్‌గా పట్టుకోవడంతో వలంటీర్ బాగోతం వెలుగు చూసింది. బాధితులు తహసిల్దార్‌కు ఫిర్యాదు చేశారు.