ఉత్తర, దక్షిణ కొరియాల మధ్య సరిహద్దు రోడ్ల ధ్వంసం
ABN , Publish Date - Oct 15 , 2024 | 03:30 AM
ఉత్తర కొరియా- దక్షిణ కొరియా దేశాల మధ్య వివాదం మరింత ముదురుతోంది. ఇరు దేశాలను అనుసంధానించే రోడ్లను ధ్వంసం చేసేందుకు ఉత్తర కొరియా సిద్ధమైంది.
దక్షిణ కొరియా దళాలు రావొద్దనే!
సియోల్‌, అక్టోబరు 14: ఉత్తర కొరియా- దక్షిణ కొరియా దేశాల మధ్య వివాదం మరింత ముదురుతోంది. ఇరు దేశాలను అనుసంధానించే రోడ్లను ధ్వంసం చేసేందుకు ఉత్తర కొరియా సిద్ధమైంది. యుద్ధం వేళ సియోల్‌ దళాలు తమ దేశంలోకి చొచ్చుకురాకుండా ఉత్తర కొరియా ఈ చర్యలు చేపట్టినట్లు భావిస్తున్నారు. దక్షిణ కొరియాతో అనుసంధానమయ్యే అన్ని రకాల రవాణా మార్గాలను ధ్వంసం చేస్తామని, సోమవారంలోపు ఆ పని పూర్తి చేస్తామని ఉత్తర కొరియా సైన్యం గత వారమే ప్రకటించింది.
ఆ పనిని పూర్తి చేసేందుకు కిమ్‌ దళాలు ఇప్పటికే సమాయాత్తమయినట్లు దక్షిణ కొరియా ఆర్మీ అధికార ప్రతినిధి సోమవారం ప్రకటించారు. ఉత్తర కొరియా రాజధాని ప్యాంగాంగ్‌వైపు దక్షిణ కొరియా డ్రోన్లను పంపడంపై కిమ్‌ సర్కారు గుర్రుగా ఉన్నారు. ఆ దేశ డ్రోన్లు ప్యాంగాంగ్‌వైపు మళ్లీ కనిపిస్తే తీవ్ర చర్యలు ఉంటాయని హెచ్చరించింది. శతఘ్ని దళం సహా ఇతర కీలక యూనిట్లను ఇప్పటికే సరిహద్దులోకి పంపినట్లు పేర్కొంది. కిమ్‌ సోదరి కూడా ఇప్పటికే హెచ్చరించారు.
