If My Cry is Loud - Put Ear Plugs : విమానంలో వినూత్న ప్రయోగం!

విమానాల్లో ప్రయాణించే సమయాల్లో పిల్లలు ఏడ్వటం.. వాళ్లను తల్లులు, అమ్మమ్మలు సముదాయించటం మనకు చాలా సార్లు కనిపిస్తూ ఉంటుంది. విమానంలో ప్రయాణించే కొందరు ప్రయాణికులకు - ఈ వ్యవహారమంతా ఇబ్బందిగా ఉంటుంది. ముఖ్యంగా అంతర్జాతీయ విమానాలలో పిల్లలు ఏడుస్తుంటే ఇతరులు చిరాకు పడతారు. అందుకే దక్షిణ కొరియాకు చెందిన ఒక మహిళ ఒక వినూత్న ప్రయోగం చేసింది. ఈ మహిళ దక్షిణ కొరియా నుంచి అమెరికాకు తన నాలుగు నెలల పాపను తీసుకు వెళ్తోంది. ఆ పాప వల్ల కలిగే అసౌకర్యానికి చింతించమంటూ తాను ప్రయాణిస్తున్న విమానంలోని 200 మంది ప్రయాణికులకు - బ్యాగులు పంచిపెట్టింది. ప్రతి బ్యాగులో- ఇయర్‌ ప్లగ్స్‌, చ్యూయింగ్‌ గమ్‌తో పాటు ఒక చిన్న సందేశం కూడా ఉంది. ఈ సందేశంలో - ‘‘హాయ్‌! నా పేరు జున్‌ వూ. నాకు నాలుగు నెలలు. నేను మా అమ్మ, అమ్మమ్మలతో కలిసి అమెరికా వెళ్తున్నాను. ఇది నా తొలి విమాన ప్రయాణం. చాలా భయంగా ఉంది. వీలైనంత వరకు ఏడ్వకుండా ఉండటానికి ప్రయత్నిస్తా. నా ఏడుపు పెద్దగా ఉంటే- ఇయర్‌ ప్లగ్స్‌ పెట్టుకోండి..’’ అని ఉంది.