Sachin Tendulkar: 37 బంతుల్లోనే షాహిద్ అఫ్రీది ఫాస్టెస్ట్ సెంచరీ.. ఆ రికార్డు వెనుక సచిన్ బ్యాట్ పాత్ర ఏంటంటే..

ప్రపంచంలోనే అత్యంత విధ్వంసకర బ్యాటర్లలో పాకిస్తాన్ మాజీ ఆటగాడు షాహిద్ అఫ్రీది (Shahid Afridi) ఒకడు. అతడు బ్యాట్ పట్టుకుని క్రీజులోకి దిగితే ఉన్నంత సేపు బౌండరీల వర్షం కురిపిస్తాడు. ఆ క్రమంలో పలు వేగవంతమైన సెంచరీలు కూడా చేశాడు. 1996లో శ్రీలంకపై జరిగిన వన్డే మ్యాచ్‌లో కేవలం 37 బంతుల్లోనే శతకం (37-ball century) సాధించి క్రికెట్ ప్రపంచాన్ని నివ్వెరపరిచాడు. అఫ్రీది నమోదు చేసిన ఈ రికార్డు దాదాపు 18 ఏళ్ల పాటు నెంబర్ వన్‌గా నిలిచింది. కాగా, షాహిద్ అఫ్రీది సాధించిన ఆ రికార్డు సెంచరీ వెనుక మాస్టర్ బ్లాస్టర్ సచిన్ టెండూల్కర్ (Sachin Tendulkar) బ్యాట్‌ది కీలక పాత్ర అట. ఆ ఆసక్తికర విషయాన్ని అఫ్రీది తాజాగా బయటపెట్టాడు.

``శ్రీలంకపై నేను రికార్డు సెంచరీ చేసిన బ్యాట్ నాకెంతో ప్రత్యేకం. నా అభిమాన క్రికెటర్లలో ఒకడైన సచిన్ టెండూల్కర్ బ్యాట్ అది. ఆ బ్యాట్‌తోనే నేను ప్రపంచ రికార్డు నెలకొల్పా. ఈ సందర్భంగా నేను వకార్ యూనిస్‌కు ప్రత్యేకంగా ధన్యవాదాలు చెప్పుకోవాలి. ఎందుకంటే మ్యాచ్‌కు ముందు ప్రాక్టీస్ సమయంలో ఆ బ్యాట్‌ను నాకు వకార్ యూనిస్ ఇచ్చాడు. ఈ బ్యాట్‌తోనే మ్యాచ్ ఆడాలి అని చెప్పాడు. ఆ బ్యాట్ నన్ను క్రికెటర్‌గా తీర్చిదిద్దందని చెప్పాలి. ఆ బ్యాట్‌తో తర్వాత కొన్ని మ్యాచ్‌లే ఆడా. దానిని జాగ్రత్తగా ఉంచుకోవాలనుకుని భద్రంగా దాచేశా`` అంటూ అఫ్రీది చెప్పాడు.

అదే ఏడాది పాక్‌పై జయసూర్య 48 బంతుల్లోనే సెంచరీ చేసి రికార్డును సృష్టించాడు. ఆ రికార్డును అదే ఏడాది అఫ్రీది అధిగమించాడు. అయితే అఫ్రీది రికార్డు 18 ఏళ్ల పాటు పదిలంగా ఉంది. 2014లో న్యూజిలాండ్ బ్యాటర్ కోరే ఆండర్సన్ 36 బంతుల్లోనే సెంచరీ చేసి ఆ రికార్డును తుడిపేశాడు. అదే ఏడాది దక్షిణాఫ్రికా బ్యాటర్ ఏబీ డీవిల్లీర్స్ 31 బంతుల్లోనే శతకానికి చేరుకుని సరికొత్త రికార్డును నమోదు చేశాడు.

ఇవి కూడా చదవండి..

ఇప్పటికి.. 25

స్వియటెక్‌కు షాక్‌

మరిన్ని క్రీడా వార్తలు కోసం క్లిక్ చేయండి..