Janagama: కొడుకు బట్టల దుకాణం దగ్ధం... మనస్తాపంతో తండ్రి మృతి
ABN , Publish Date - Oct 29 , 2024 | 04:01 AM
అగ్నిప్రమాదంలో తన కొడుకు బట్టల దుకాణం పూర్తిగా దగ్ధం కావడంతో తీవ్ర మనస్తాపానికి గురైన తండ్రి గుండెపోటుతో మృతి చెందిన ఘటన జనగామ జిల్లా కేంద్రంలో సోమవారం జరిగింది.
జనగామ కాంప్లెక్స్‌ ప్రమాదంలో షాపు బుగ్గి
70 లక్షల మేర నష్టం... తీవ్ర మనోవేదనతో గుండెపోటు
జనగామ, అక్టోబరు 28 (ఆంధ్రజ్యోతి): అగ్నిప్రమాదంలో తన కొడుకు బట్టల దుకాణం పూర్తిగా దగ్ధం కావడంతో తీవ్ర మనస్తాపానికి గురైన తండ్రి గుండెపోటుతో మృతి చెందిన ఘటన జనగామ జిల్లా కేంద్రంలో సోమవారం జరిగింది. ఆదివారం తెల్లవారుజామున జనగామ పట్టణంలోని ఓ షాపింగ్‌ కాంప్లెక్స్‌లో ప్రమాదవశాత్తు మంటలు చెలరేగి పలు బట్టల దుకాణాలు దగ్ధమైన సంగతి తెలిసిందే. ఈ ప్రమాదంలో ఎస్‌ఆర్‌ బ్రదర్స్‌ అనే బట్టల దుకాణం పూర్తిగా దగ్ధమైంది.
దుకాణ యజమాని అయిన స్వర్గం శ్రీనివా్‌సకు రూ.70 లక్షల వరకు నష్టం వాటిల్లింది. ఈ క్రమంలో కొడుకు పరిస్థితిని చూసి శ్రీనివాస్‌ తండ్రి లక్ష్మీనారాయణ(77) తీవ్ర మనోవేదనకు లోనయ్యాడు. సోమవారం మధ్యాహ్నం ఒంటి గంట సమయంలో ఛాతిలో నొప్పిగా ఉందటూ ఇంట్లో ఒక్కసారిగా కుప్పకూలిపోయి మృతి చెందాడు. దీంతో ఆ కుటుంబంలో విషాదం నెలకొంది.
