Israel Attack: స్కూల్‌పై విరుచుకుపడ్డ ఇజ్రాయెల్ సేనలు.. 18 మంది మృతి

ఇంటర్నెట్ డెస్క్: గాజా(Gaza) నగరంలో నిరాశ్రయులకు ఆశ్రయం కల్పిస్తున్న పాఠశాలపై ఇజ్రాయెల్.. ఆదివారం తెల్లవారుజామున వైమానిక దాడి చేసింది. ఈ దాడుల్లో 18 మంది మృతి చెందారు. టెల్‌అవీవ్‌ శివార్లలో ఓ పాలస్తీనా మిలిటెంట్ కత్తితో జరిపిన దాడుల్లో ఇద్దరు మృతి చెందారు. మరో ఇద్దరికి తీవ్ర గాయాలయ్యాయి.ఆక్రమిత వెస్ట్ బ్యాంక్‌లో జరిగిన రెండు దాడుల్లో స్థానిక హమాస్ కమాండర్ సహా తొమ్మిది మంది ఉగ్రవాదులు హతమయ్యారని హమాస్ తెలిపింది.మరణించిన వారిలో ఒకరు తుల్కర్మ్ బ్రిగేడ్‌ల కమాండర్ అని, మిగతావారు ఇస్లామిక్ జిహాద్ సమ్మెకి చెందిన నలుగురు వ్యక్తులని తెలిపింది. ఇజ్రాయెల్-హమాస్ యుద్ధం క్రమంలో వెస్ట్ బ్యాంక్‌లో హింస పెచ్చుమీరుతోంది. ఇరాన్, లెబనాన్‌కి చెందిన హిజ్బుల్లా గ్రూప్‌తో ఇజ్రాయెల్‌కి వివాదం పెరుగుతోంది.

ఈ క్రమంలో పాలస్తీనా భూభాగాలలో తాజా దాడులు జరిగాయి. గాజా ఆరోగ్య శాఖ అధికారులు తెలిపిన వివరాల ప్రకారం.. గాజాలో ఇజ్రాయెల్ జరిపిన దాడుల్లో ఇప్పటి వరకు కనీసం 39 వేల 550 మంది పాలస్తీనియన్లు మరణించారు. ఇజ్రాయెల్ లెక్కల ప్రకారం.. 2023 అక్టోబర్ 7న దక్షిణ ఇజ్రాయెల్‌పై హమాస్ దాడిలో 1,200 మంది మరణించగా.. 250 మంది అపహరణకు గురయ్యారు.

ఆ ఘటన తరువాత ఉద్రిక్తం..

హమాస్ చీఫ్ ఇస్మాయిల్ హనియా హత్య తర్వాత పరిస్థితులు మరింత ఉద్రిక్తంగా మారాయి. ఇజ్రాయెల్ యుద్ధం చేస్తున్న హనీయాను ఇరాన్లో కోవర్ట్ ఆపరేషన్తో అంతమొందించింది. అందుకు ఇజ్రాయెల్ పై ప్రతీకారం తీర్చుకోవాలని ఉగ్రవాద సంస్థ హిజ్బుల్లా ప్రయత్నాలు వేగవంతం చేసింది. ఇందులో భాగంగా హిజ్బుల్లా ఉత్తర ఇజ్రాయెల్లోని నీట్ హిట్లెల్ నగరంపై డజన్ల కొద్దీ కటియుషా రాకెట్లను ప్రయోగించగా ఇజ్రాయెల్ నిలువరించింది.

ఈ దాడిపై హిజ్బుల్లా అధికారిక ప్రకటన చేసింది. ఇందులో తమ పౌరులు గాయపడ్డారని.. దీంతో తాము కటియుషా రాకెట్లు ప్రయోగించినట్లు తెలిపింది. అయితే ఇజ్రాయెల్ మాత్రం వెనక్కి తగ్గట్లేదు. ఇజ్రాయెల్‌కు అమెరికా రక్షణగా నిలుస్తోంది. దాడుల్లో సాయం చేసేందుకు ఇజ్రాయెల్‌కు అమెరికా అదనపు యుద్ధ నౌకలను, ఫైటర్ జెట్లను అందజేస్తోంది.