Allahabad High Court:నచ్చిన పద్ధతిలో పెళ్లి చేసుకోవచ్చు
ABN , Publish Date - Jun 11 , 2024 | 03:14 AM
నచ్చిన పద్ధతిలో వివాహం చేసుకునే హక్కు మేజర్‌కు ఉందని అలహాబాద్‌ హైకోర్టు స్పష్టం చేసింది. ఇష్టమైన వారితో కలిసి ఉండే హక్కు కూడా ఉందని, ఇందుకు రాజ్యాంగం రక్షణ కల్పిస్తుందని తెలిపింది.
అలహాబాద్‌ హైకోర్టు తీర్పు
ప్రయాగ్‌రాజ్‌, జూన్‌ 10: నచ్చిన పద్ధతిలో వివాహం చేసుకునే హక్కు మేజర్‌కు ఉందని అలహాబాద్‌ హైకోర్టు స్పష్టం చేసింది. ఇష్టమైన వారితో కలిసి ఉండే హక్కు కూడా ఉందని, ఇందుకు రాజ్యాంగం రక్షణ కల్పిస్తుందని తెలిపింది. ఓ వివాహం విషయమై మేజిస్ట్రేటు కోర్టు ఇచ్చిన ఆదేశాలను కొట్టివేస్తూ జస్టిస్‌ జె.జె.మునీర్‌, జస్టిస్‌ అరుణ్‌ కుమార్‌ దేశ్వాల్‌ల ధర్మాసనం సోమవారం ఈ మేరకు తీర్పు ఇచ్చింది. 21 ఏళ్ల మహిళ ఏప్రిల్‌ నెలలో ముస్లిం సంప్రదాయాల ప్రకారం ఓ వ్యక్తిని వివాహం చేసుకుంది. అయితే ఈ పెళ్లి చెల్లదని యువతి తల్లిదండ్రులు కేసు వేశారు. మేజిస్ట్రేటు కోర్టు కూడా అందుకు అనుకూలంగా తీర్పునిచ్చింది. దీనిని సవాలు చేస్తూ యువతి హైకోర్టులో అప్పీలు చేశారు. విచారణ జరిపిన ధర్మాసనం కింది కోర్టు ఉత్తర్వులను పక్కన పెట్టింది.
