NRI:శాన్ ఫ్రాన్సిస్కోలో మంత్రి లోకేష్ కు ఘన స్వాగతం

ఆంధ్రప్రదేశ్‌కు పెట్టుబడులను ఆకర్షించడమే లక్ష్యంగా రాష్ట్ర ఐటీ, మానవ వనరుల శాఖ మంత్రి నారా లోకేశ్ అమెరికాలో పర్యటిస్తున్నారు. వారం రోజుల పర్యటనలో భాగంగా తొలుత శాన్ ఫ్రాన్సిస్కో చేరుకున్న మంత్రి లోకేశ్‌కు శాన్ ఫ్రాన్సిస్కో విమానాశ్రయంలో టీడీపీ ఎన్నారై విభాగం ఆధ్వర్యంలో తెలుగుదేశం పార్టీ అభిమానులు, తెలుగు ప్రముఖులు ఘన స్వాగతం పలికారు. టీడీపీ జాతీయ అధ్యక్షులు సీఎం చంద్రబాబు నాయుడు ముందుచూపు కారణంగానే ప్రపంచ ఐటీ రంగంలో తెలుగువారు ఓ వెలుగు వెలుగుతున్నారని ఈసందర్భంగా టీడీపీ ఎన్నారై విభాగం ఒక ప్రకటనలో తెలిపింది. భారతదేశ ఐటీ రంగంలో హైదరాబాద్ -హైటెక్ సిటీ పేరు చెప్పగానే గుర్తొచ్చేది చంద్రబాబు నాయుడు. 2000 సంవత్సరంలో విజన్ 2020 అంటూ ఐటీ రంగం సాధించబోయే అభివృద్ధిని అంచనా వేసిన విజనరీ లీడర్ చంద్రాబాబని పేర్కొంది. ఈ నేపథ్యంలో తండ్రి అడుగుజాడల్లో నడుస్తున్న ఐటీ శాఖా మంత్రి నారా లోకేశ్  2047 నాటికి వికసిత్ ఆంధ్ర ప్రదేశ్ సాధనకు అహర్నిశలు శ్రమిస్తున్నారని టీడీపీ ఎన్నారై విభాగం పేర్కొంది.

తన తండ్రి రాజకీయ వారసత్వంతో పాటు ఐటీ రంగంపై చంద్రబాబుకు ఉన్న ప్రత్యేక శ్రద్ధను లోకేష్ పుణికి పుచ్చుకున్నారని, ఈ క్రమంలోనే ఏపీలో పెట్టుబడులను ఆకర్షించడమే లక్ష్యంగా నారా లోకేష్ ఈనెల25వ తేదీ నుంచి అమెరికాలో పర్యటిస్తున్నారని టీడీపీ ఎన్నారై విభాగం తెలిపింది. ఈ క్రమంలోనే శాన్ ఫ్రాన్సిస్కో విమానాశ్రయంలో లోకేష్ కు ఘన స్వాగతం పలికేందుకు టీడీపీ ఎన్నారై నేతలు, కార్యకర్తలు భారీ సంఖ్యలో తరలివచ్చారు. ఆంధ్రప్రదేశ్‌లో ఎన్డీఏ కూటమి ‘అఖండ’ విజయం తర్వాత తొలిసారిగా లోకేష్ అమెరికాలో పర్యటిస్తున్నారు. నభూతో నభవిష్యత్తు అనే రీతిలో టీడీపీ విజయం సాధించడంతో ఎన్నారై టీడీపీ నేతలు, కార్యకర్తలు ఫుల్ జోష్ లో ఉన్నారు. మంగళగిరి ఎన్నికల్లో ఆల్ టైం రికార్డు బద్దలు కొట్టి తిరుగులేని విజయం సాధించి మంత్రి బాధ్యతలు స్వీకరించిన లోకేష్‌కు గ్రాండ్ వెల్ కమ్ చెప్పేందుకు భారీ సంఖ్యలో టీడీపీ ఎన్నారై నేతలు పెద్దఎత్తున విమానాశ్రయానికి వచ్చారు.

అక్టోబర్ 25 నుంచి నవంబర్ 1వ తేదీ వరకు మంత్రి లోకేష్ అమెరికాలో పర్యటిస్తారు. ఈనెల 29న లాస్ వేగాస్ నగరంలో ఐటీ సర్వీస్ సినర్జీ’ 9వ సదస్సుకు మంత్రి లోకేష్ హాజరవుతారు. ఏపీలో పెట్టుబడులు పెట్టేలా పలు ప్రముఖ ఐటీ కంపెనీల ప్రతినిధులతో లోకేష్ భేటీ కానున్నారు. అట్లాంటాలో ఎన్టీఆర్ ట్రస్ట్ తరపున ఏర్పాటుచేసిన అన్న ఎన్టీఆర్ విగ్రహావిష్కరణ కార్యక్రమంలో లోకేష్ పాల్గొంటారు. ఈ సందర్భంగా నిర్వహించే సభకు ఎన్నారై టీడీపీ నేతలు, టీడీపీ అభిమానులు, ఎన్నారైలు భారీ సంఖ్యలో హాజరవుతారని టీడీపీ ఎన్నారై నాయకులు తెలిపారు. ఎన్నారై టీడీపీ యూఎస్ఏ కో ఆర్డినేటర్ జయరాం కోమటి, ఎన్నారై టీడీపీ మీడియా కో ఆర్డినేటర్ సాగర్ దొడ్డపనేని, స్థానిక టీడీపీ నేతలు శశి దొప్పలపూడి, శ్రీకాంత్ దొడ్డపనేని, టీడీపీ జోనల్ ఇన్ చార్జి రవి మందలపు, ఐటి సర్వ్ ప్రతినిధులు వినోద్ ఉప్పు, సతీష్ మండువ, సురేష్ మానుకొండ మంత్రి లోకేష్ కు విమానశ్రయంలో ఘన స్వాగతం పలికారు. లోకేష్ పర్యటన నేపథ్యంలో ఏపీలో ఉన్న పలువురు ఎన్‌ఆర్‌ఐ టీడీపీ నేతలు అమెరికా విచ్చేశారని టీడీపీ ఎన్నారై విభాగం తెలిపింది.

మరిన్ని వార్తల కోసం ఇక్కడ క్లిక్ చేయండి

Read More Latest Telugu News Click Here