TGPSC: గ్రూప్‌-3 హాల్‌టికెట్లు సిద్ధం..
ABN , Publish Date - Nov 11 , 2024 | 04:22 AM
రాష్ట్రంలో 1,365 పోస్టుల భర్తీకి తెలంగాణ పబ్లిక్‌ సర్వీస్‌ కమిషన్‌(టీజీపీఎస్సీ) నిర్వహిస్తున్న గ్రూప్‌-3 పరీక్షల హాల్‌టికెట్లు ఆదివారం నుంచి అందుబాటులోకి వచ్చా యి.
ఈ నెల 17, 18 తేదీల్లో పరీక్షలు
హైదరాబాద్‌, నవంబరు 10 (ఆంధ్రజ్యోతి): రాష్ట్రంలో 1,365 పోస్టుల భర్తీకి తెలంగాణ పబ్లిక్‌ సర్వీస్‌ కమిషన్‌(టీజీపీఎస్సీ) నిర్వహిస్తున్న గ్రూప్‌-3 పరీక్షల హాల్‌టికెట్లు ఆదివారం నుంచి అందుబాటులోకి వచ్చా యి. అభ్యర్థులు టీజీపీఎస్సీ వెబ్‌సైట్‌ నుంచి అడ్మిట్‌ కార్డులను డౌన్‌లోడ్‌ చేసుకోవచ్చు. ఈ నెల 17, 18 తేదీల్లో పరీక్షలు జరగనున్నాయి. మొదటి రోజు రెండు సెషన్లలో జనరల్‌ స్టడీస్‌, హిస్టరీ-పాలిటీ-సొసైటీ, రెండో రోజు ఎకానమీ సబ్జెక్టుల్లో పరీక్షలు జరుగుతాయి. ఈ పోస్టులకోసం 5.68 లక్షల మంది అభ్యర్థులు దరఖాస్తు చేసుకున్నట్లు టీజీపీఎస్సీ ఒక ప్రకటనలో తెలిపింది.
మొదటి సెషన్‌ పరీక్ష ఉదయం 10 నుంచి మధ్యాహ్నం 12.30 వరకు.. రెండో సెషన్‌ మధ్యాహ్నం 3 నుంచి సాయంత్రం 5.30 వరకు నిర్వహిస్తారు. పరీక్ష మొదలవ్వడానికి అరగంట ముందే గేట్లను మూసివేయనున్నట్లు అధికారులు వెల్లడించారు. అంటే.. ఉదయం సెషన్‌లో 9.30, మధ్యాహ్నం సెషన్‌లో 2.30 గంటల్లోపు అభ్యర్థులు పరీక్ష కేంద్రాలకు చేరుకోవాల్సి ఉంటుంది. అభ్యర్థులు ఒకే హాల్‌టికెట్‌ను అన్ని పరీక్షలకు వినియోగించాల్సి ఉంటుందని తెలిపారు. అభ్యర్థులకు ఏమైనా సందేహాలున్నా, అదనపు సమాచారం కావాలన్నా కమిషన్‌ ఫోన్‌ నంబర్లు 040-23542185, 040-23542187లను సంప్రదించాలని సూచించారు.
