Road Accident: రాఖీ కట్టేందుకు వెళుతూ.. మహిళ మృతి

ఖమ్మంక్రైం, ఆగస్టు 18: రాఖీ పండుగ సందర్భంగా తన సోదరుడికి రాఖీ కట్టేందుకు వెళుతూ ఓ మహిళ రోడ్డు ప్రమాదంలో మృతి చెందింది. ఖమ్మంలో ఆదివారం ఈ ఘటన జరిగింది. ఖమ్మం జిల్లా కూసుమంచి మండలం చౌటపల్లి గ్రామానికి చెందిన గాజుల మల్లమ్మ (58) సోమవారం రాఖీ పండుగ సందర్భంగా ఖమ్మంలో ఉండే తన తమ్ముడికి రాఖీ కట్టేందుకు ఆదివారం వచ్చింది.

ఈ క్రమంలో కొత్తబస్టాండ్‌లో బస్సు దిగి నడుచుకుంటూ వెళుతుండగా అతి వేగంగా వెనుక నుంచి వచ్చిన ఓ కారు ఆమెను ఢీకొట్టింది. దీంతో ఆమె గాల్లోకి ఎగిరి పది మీటర్ల దూరంలో పడిపోయి అక్కడికక్కడే మృతి చెందింది. మహిళను ఢీకొట్టిన కారు ఆ తరువాత రోడ్డు పక్కనే ఉన్న రెండు స్తంభాలను, ట్రాన్స్‌ఫార్మర్‌ పిల్లర్‌ను ఢీకొట్టి ఆగింది. కారులో ఎయిర్‌ బెలూన్స్‌ తెరుచుకోవడంతో కారు నడుపుతున్న వ్యక్తితో పాటు పక్కనే ఉన్న మహిళకు స్వల్ప గాయాలయ్యాయి. అతి వేగమే ప్రమాదానికి కారణమని స్థానికులు తెలిపారు.