Khammam: పొంగులేటి నివాసంలో ఐటీ సోదాలు
ABN , First Publish Date - 2023-11-09T07:56:48+05:30 IST
ఖమ్మం: మాజీ ఎంపీ, కాంగ్రెస్ పాలేరు అభ్యర్థి పొంగులేటి శ్రీనివాసరెడ్డి నివాసం, కార్యాలయాలపై గురువారం ఉదయం ఐటి అధికారులు సోదాలు చేపట్టారు. అయితే ఇది ఊహించిన పరిణామమే అని పొంగులేటి అనుచరులు అంటున్నారు.
ఖమ్మం: మాజీ ఎంపీ, కాంగ్రెస్ పాలేరు అభ్యర్థి పొంగులేటి శ్రీనివాసరెడ్డి (Ponguleti Srinivas Reddy) నివాసం, కార్యాలయాలపై గురువారం ఉదయం ఐటి అధికారులు (IT Officers) సోదాలు చేపట్టారు. అయితే ఇది ఊహించిన పరిణామమే అని పొంగులేటి అనుచరులు అంటున్నారు. తనపై ఐటి దాడులు ఉండొచ్చునని మూడు రోజుల క్రితమే పొంగులేటి ప్రకటించారు. ఆయన చెప్పినట్లుగానే ఐటీ అధికారులు సోదాలు చేస్తున్నారు.
గురువారం తెల్లవారుజామున 4:30 గంటల నుంచి ఖమ్మంలోని పొంగులేటి నివాసం, కార్యాలయాల్లో ఈ సోదాలు జరుగుతున్నాయి. 8 వాహనాల్లో ఐటీ అధికారులు వచ్చారు. కాగా ఈరోజు పొంగులేటి నామినేషన్ దాఖలు చేయనున్నారు. ఈ క్రమంలోనే ఆయన కుటుంబ సభ్యులందరూ ఖమ్మంలోని ఇంటికి చేరుకున్నారు. తెల్లవారుజాము 4:30 గంటలకు వచ్చిన ఐటీ అధికారులు పొంగులేటి కుటుంబసభ్యుల నుంచి సెల్ ఫోన్లు స్వాధీనం చేసుకున్నారు. పొంగులేటి అనుచరుల సెల్ ఫోన్లు కూడా స్వాధీనం చేసుకున్నారు. అలాగే హైదరాబాద్‌లోని జూబ్లీహిల్స్‌లో పొంగులేటికి చెందిన నివాసంలో కూడా ఐటీ అధికారులు సోదాలు చేస్తున్నారు.
