Chirag Chikkara: రెజ్లింగ్‌లో చిరాగ్ చిక్కారాకు గోల్డ్ మెడల్

తిరానా: భారత యువ రెజ్లర్ చిరాగ్ చిక్కారా స్వర్ణం చేజిక్కించుకున్నాడు. అండర్23 ప్రపంచ ఛాంపియన్‌గా నిలిచిన అతికొద్దిమంది జాబితాలో ఇప్పుడు చిరాగ్ పేరు చేరింది. చిరాగ్ యు23 ప్రపంచ ఛాంపియన్‌షిప్‌లో స్వర్ణ పతకాన్ని సాధించిన మూడవ భారతీయ రెజ్లర్‌గా నిలిచాడు. ప్రస్తుతం అల్బేనియాలో జరుగుతున్న ఏజ్ గ్రూప్ టోర్నమెంట్‌లో ఈ ఘనత సాధించాడు.

57 కేజీల విభాగంలో చిరాగ్ 4-3తో కిర్గిజ్ స్థాన్‌కు చెందిన అబ్దిమలిక్ కరాచోవ్‌ను చివరి కొన్ని సెకన్లలో ఓడించి స్వర్ణ పతకాన్ని కైవసం చేసుకున్నాడు. పారిస్ ఒలింపిక్స్ కాంస్య పతక విజేత అమన్ సెహ్రావత్ యు23 టైటిల్‌ను గెలుచుకున్న మొదటి భారతీయుడు. అతను 2022లో అదే వెయిట్ విభాగంలో స్వర్ణం సాధించాడు. యు23 ఛాంపియన్‌గా నిలిచిన మొదటి భారతీయ మహిళ రీతికా హుడా. గతేడాది 76 కేజీల విభాగంలో ఆమె బంగారు పతకాన్ని కైవసం చేసుకుంది.

భారత్ ఒక స్వర్ణం, ఒక రజతం, ఏడు కాంస్యాలతో తొమ్మిది పతకాలతో తాజా టోర్నీని ముగించింది. భారత జట్టు 82 పాయింట్లతో నాలుగో స్థానంలో నిలిచింది. మహిళల 59 కేజీల విభాగంలో ఇరాన్‌ (158), జపాన్‌ (102), అజర్‌బైజాన్‌ (100) తొలి మూడు స్థానాల్లో నిలిచిన అంజలి ఫైనల్‌లో ఉక్రెయిన్‌కు చెందిన సోలోమియా విన్నిక్‌ చేతిలో ఓడి రజతం సాధించింది. నేహా శర్మ (57 కేజీలు), శిక్షా (65 కేజీలు), మోనికా (68 కేజీలు) తమ తమ మహిళల విభాగాల్లో కాంస్య పతకాలను సాధించారు.