Viral Video: ఢిల్లీ చేరుకున్న T20 ప్రపంచ కప్ విజేతలు.. మోదీతో భేటీ తర్వాత

టీ20 ప్రపంచ కప్ ట్రోఫీతో టీమ్ ఇండియా(Team India) తిరిగి భారతదేశానికి చేరుకుంది. ఎయిర్ ఇండియా ప్రత్యేక విమానం AIC24WC (ఎయిర్ ఇండియా ఛాంపియన్స్ 24 వరల్డ్ కప్) భారత కాలమానం ప్రకారం ఉదయం 6.10 గంటలకు ఢిల్లీ విమానాశ్రయానికి(Delhi Airport) చేరింది. ఈ నేపథ్యంలో భారత క్రికెట్ జట్టుకు స్వాగతం పలికేందుకు అభిమానులు పెద్ద ఎత్తున విమానాశ్రయానికి చేరుకున్నారు. తుఫాను కారణంగా బార్బడోస్‌లో మూడు రోజుల పాటు చిక్కుకుపోయిన భారత బృందం ఎట్టకేలకు గ్రాంట్లీ ఆడమ్స్ అంతర్జాతీయ విమానాశ్రయం నుంచి ప్రత్యేక విమానంలో బుధవారం ఢిల్లీకి బయలుదేరింది. బీసీసీఐ ఈ ప్రత్యేక విమానాన్ని ఏర్పాటు చేసింది. గురువారం ముంబైలోని వాంఖడే స్టేడియంలో బహిరంగ బస్సులో రోడ్ షో అనంతరం ఏర్పాటు చేసిన కార్యక్రమంలో టీ20 ప్రపంచకప్ విజేత భారత క్రికెట్ జట్టును సన్మానించనున్నారు.

భారీ సంఖ్యలో ఫ్యాన్స్

భారత క్రికెట్ జట్టుకు స్వాగతం పలికేందుకు భారీ సంఖ్యలో అభిమానులు ఢిల్లీ విమానాశ్రయానికి చేరుకున్నారు. టీ20 ప్రపంచకప్ 20245 ట్రోఫీని గెలుచుకున్న తర్వాత టీమిండియా ఢిల్లీ విమానాశ్రయానికి చేరుకుంది. వర్షం కురుస్తున్నప్పటికీ అభిమానులందరూ ఢిల్లీ విమానాశ్రయం వెలుపల త్రివర్ణ పతాకాన్ని చేతిలో పట్టుకుని నిలబడ్డారు.

బీసీసీఐ వీడియో

మరోవైపు భారత క్రికెట్ జట్టుకు సంబంధించిన వీడియోను బీసీసీఐ కూడా షేర్ చేసింది. ఈ క్రమంలో 'ఇట్స్ హోమ్' అని రాసుకొచ్చింది. వీడియోలో రోహిత్ శర్మ, బుమ్రా, విరాట్ కోహ్లీ సహా పలువురు ఆటగాళ్లు ట్రోఫీని పట్టుకోవడం గమనించవచ్చు.

ప్రధాని మోదీతో భేటీ

భారత జట్టులోని ఆటగాళ్లందరూ నేరుగా బస్సులో హోటల్‌కు బయలుదేరారు. మొత్తం జట్టు ఉదయం 11 గంటలకు ప్రధాని నరేంద్ర మోడీని కలువనున్నారు. ఢిల్లీలో ప్రధాని నరేంద్ర మోడీని కలిసిన తర్వాత, భారత జట్టులోని ఆటగాళ్లందరూ ముంబైకి బయలుదేరుతారు. అక్కడ సాయంత్రం 5 గంటల నుంచి నారిమన్ పాయింట్ వాంఖడే స్టేడియం వరకు ఓపెన్ బస్సులో విజయ పరేడ్ నిర్వహించబడుతుంది.

ఇది కూడా చదవండి:

Viral Video: ఢిల్లీ చేరుకున్న T20 ప్రపంచ కప్ విజేతలు.. మోదీతో భేటీ తర్వాత

Koo: మూతపడిన దేశీ 'ట్విట్టర్' కూ.. ఎందుకిలా చేశారు, ఏమైందంటే..

Read Latest Sports News and Telugu News