రేవంత్‌.. డైనమిక్‌ లీడర్‌!
ABN , Publish Date - Nov 08 , 2024 | 04:26 AM
ప్రజాస్వామ్యాన్ని తుంగలో తొక్కి, నిర్బంధాలతో పాలన చేస్తున్న కేసీఆర్‌పై పోరాడి ప్రజల్లో డైనమిక్‌ లీడర్‌గా రేవంత్‌ రెడ్డి గుర్తింపు పొందారని టీపీసీసీ చీఫ్‌ మహేశ్‌ కుమార్‌ గౌడ్‌ అన్నారు.
సీఎంపై రాసిన ‘ఒకే ఒక్కడు’ పుస్తకాన్ని ఆవిష్కరించిన టీపీసీసీ చీఫ్‌ మహేశ్‌ గౌడ్‌
‘డైనమిక్‌ లీడర్‌’ పుస్తకాన్ని ఆవిష్కరించిన సీఎం సోదరులు..
హైదరాబాద్‌/సరూర్‌నగర్‌, నవంబరు 7 (ఆంధ్రజ్యోతి): ప్రజాస్వామ్యాన్ని తుంగలో తొక్కి, నిర్బంధాలతో పాలన చేస్తున్న కేసీఆర్‌పై పోరాడి ప్రజల్లో డైనమిక్‌ లీడర్‌గా రేవంత్‌ రెడ్డి గుర్తింపు పొందారని టీపీసీసీ చీఫ్‌ మహేశ్‌ కుమార్‌ గౌడ్‌ అన్నారు. ముఖ్యమంత్రి రేవంత్‌రెడ్డిపై టి.వేణుగోపాల్‌రెడ్డి, విజయార్కేలు రాసిన ‘ఒకే ఒక్కడు’ పుస్తకాన్ని గురువారం గాంధీభవన్‌లో మహేశ్‌ గౌడ్‌ ఆవిష్కరించారు. ఈ సందర్భంగా ఆయన మాట్లాడుతూ.. చిన్న వయసులో రాజకీయాల్లో విలక్షణ నేతగా రేవంత్‌ ఎదిగారన్నారు. శుక్రవారం ఆయన పుట్టినరోజు సందర్భంగా ‘ఒకే ఒక్కడు’ పుస్తకాన్ని ఆవిష్కరించినట్టు తెలిపారు. పుస్తకాన్ని రచించిన వేణుగోపాల్‌రెడ్డి, విజయార్కేలను అభినందించారు. టీపీసీసీ నుంచి ముందుగా రేవంత్‌కు పుట్టినరోజు శుభాకాంక్షలు తెలుపుతున్నామని.. ఆయన నిండు నూరేళ్లు ఆయురారోగ్యాలతో సంతోషంగా ఉండాలని కోరుకుంటున్నట్టు పేర్కొన్నారు. మరోవైపు.. సీఎం రేవంత్‌ జీవితంపై బడంగ్‌పేట్‌ మునిసిపల్‌ మాజీ వైస్‌ చైర్మన్‌ నర్సింహారెడ్డి, యూత్‌ కాంగ్రెస్‌ మహేశ్వరం నియోజకవర్గం అధ్యక్షుడు రాఘవేందర్‌రెడ్డి ఆధ్వర్యంలో ‘డైనమిక్‌ లీడర్‌’ పేరుతో పుస్తకాన్ని ముద్రించారు. రేవంత్‌ సొంతూరు కొండారెడ్డిపల్లిలో ఆయన సోదరులు కృష్ణారెడ్డి, జగదీశ్వర్‌రెడ్డి ఈ పుస్తకాన్ని ఆవిష్కరించారు. ఈ సందర్భంగా వారు మాట్లాడుతూ.. రేవంత్‌ ప్రజా పాలనను జీర్ణించుకోలేక కొందరు ప్రభుత్వాన్ని అప్రదిష్ఠపాలు చేసేందుకు కుట్రలు పన్నుతున్నారని మండిపడ్డారు.
