Shivaji: ఎన్టీఆర్ ఆత్మగౌరవం కోసం పార్టీ పెట్టారు

అనంతపురం: తెలుగు ప్రజల ఆరాధ్య నటుడు, మాజీ సీఎం స్వర్గీయ నందమూరి తారక రామారావు ( NTR ) తెలుగు ప్రజల సొత్తు అని.. ఆత్మగౌరవం కోసం పార్టీ పెట్టిన యుగపురుషుడని ప్రముఖ సినీ నటులు శివాజీ ( Shivaji ) తెలిపారు. ఎన్టీఆర్ వర్ధంతి సందర్భంగా లలిత కళాపరిషత్‌లో గురువారం సాంస్కృతిక కార్యక్రమాలు నిర్వహించారు. అనంతపురం అర్బన్ మాజీ ఎమ్మెల్యే వైకుంఠం ప్రభాకర్ చౌదరి ఆధ్వర్యంలో నిర్వహించిన ఈ కార్యక్రమాలకు ముఖ్య అతిథిగా సినీనటులు శివాజీ, నాగినీడు హాజరయ్యారు. జోహార్ ఎన్టీఆర్ అంటూ నినాదాలు చేశారు. సాంస్కృతిక కార్యక్రమాల్లో భాగంగా చిన్నారులు నృత్యాలు ప్రదర్శించారు. ఈ సందర్భంగా శివాజీ మాట్లాడుతూ... యువత పార్టీలోకి రావాలని ఎన్టీఆర్ ఆహ్వానించారని చెప్పారు. తనకు పార్టీలతో సంబంధం లేదని ఎక్కడికైనా వెళ్తానని.. రెండు మంచి మాటలు మాట్లాడుతానని తెలిపారు. మహిళలకు ఆస్తిలో సమాన హక్కు ఇచ్చిన మహానుభావుడు ఎన్టీఆర్ అని శివాజీ కొనియాడారు.