Crime: కేజీఎఫ్ సినిమా సీన్.. రియల్ లైఫ్‌లో రిపీట్.. ఓ కార్మికుడు తప్పించుకుని వెళ్లి పోలీసులకు చెప్పడంతో వెలుగులోకి విస్తుపోయే దారుణం..!
ABN , First Publish Date - 2023-06-21T19:43:01+05:30 IST
వందల మంది ప్రజలను కొందరు బానిసలుగా మార్చి బంగారు గనుల్లో పనులు చేయిస్తుంటారు. ఎదురుతిరిగిన వారిని చంపడం లేదా వివిధ రకాలుగా చిత్రహింసలకు గురి చేస్తుంటారు. విధిలేని పరిస్థితుల్లో వారంతా అక్కడే పని చేయాల్సి వస్తుంది. చివరకు హీరో ఎంటరై ..
వందల మంది ప్రజలను కొందరు బానిసలుగా మార్చి బంగారు గనుల్లో పనులు చేయిస్తుంటారు. ఎదురుతిరిగిన వారిని చంపడం లేదా వివిధ రకాలుగా చిత్రహింసలకు గురి చేస్తుంటారు. విధిలేని పరిస్థితుల్లో వారంతా అక్కడే పని చేయాల్సి వస్తుంది. చివరకు హీరో ఎంటరై వారినందరినీ అక్కడి నుంచి విముక్తుల్ని చేస్తాడు. ఇది స్థూలంగా కేజీఎఫ్ సినిమా (KGF movie) కథ. అయితే తాజాగా మహారాష్ట్రలో ఈ సినిమా సీన్ రిపీట్ అయింది. ఓ కార్మికుడు తప్పించుకుని వెళ్లి పోలీసులకు చెప్పడంతో వెలుగులోకి విస్తుపోయే దారుణం వెలుగులోకి వచ్చింది. పూర్తి వివరాల్లోకి వెళితే..
మహారాష్ట్రలోని (Maharashtra) ఉస్మానాబాద్ జిల్లా ధోకి పోలీస్ స్టేషన్ పరిధిలో ఈ ఘటన చోటు చేసుకుంది. స్థానిక ఖామస్‌వాడి, వాఖర్‌వాడి గ్రామాల్లో బావులు తవ్వే పనులు చేపట్టారు. ఇందుకోసం మూడు నెలల క్రితం కాంట్రాక్టర్లు చుట్టు పక్కల ప్రాంతాలకు చెందిన 11మంది కూలీలను రప్పించారు. ఇంతవరకూ బాగానే ఉన్నా.. పని ప్రారంభించగానే సీన్ ఒక్కసారిగా మారిపోయింది. అప్పటిదాకా కాంట్రాక్టర్లుగా (Contractors) ఉన్న వారు కాస్త.. రాక్షసుల్లా మారిపోయారు. కూలీలను ఉదయం ఏడు గంటలకు బావిలోకి దించి, ఏకదాటిగా 12గంటల పాటు పని చేయించేవారు. తర్వాత బావి నుంచి బయటకు తీసి, పారిపోకుండా గొలుసులతో బంధించేవారు. బావిలో పని చేస్తున్న (Well works) సమయంలో రోజుకు ఒక పూట మాత్రమే భోజనం పెట్టేవారు.
మధ్యలో బావి నుంచి బయటకు రాకుండా లోపలే మరుగుదొడ్డి కూడా ఏర్పాటు చేశారు. దీంతో కూలీలు తీవ్ర ఇబ్బందులు పడ్డారు. రూపాయి డబ్బులు కూడా ఇవ్వకుండా పని చేయించుకునేవారు. ఎదురుతిరిగిన వారిని చిత్రహింసలకు గురి చేసేవారు. ఇటీవల వారిలో ఓ కూలీ అక్కడి నుంచి బయటపడి పోలీసులను ఆశ్రయించాడు. అతడి ఫిర్యాదుతో శనివారం రంగంలోకి దిగిన పోలీసులు.. రెండు గ్రామాల పరిధిలో బావి పనులు చేస్తున్న మిగతా వారిని రక్షించారు. కేసు నమోదు చేసుకున్న పోలీసులు.. కూలీలను ఇలాంటి కాంట్రాక్టర్లకు విక్రయిస్తున్న ఏజెంట్లను పట్టుకునే పనిలో పడ్డారు. ఈ వార్త స్థానికంగా తీవ్ర సంచలనం సృష్టించింది.
